ಕೇಂದ್ರ ಸಮಿತಿ ಸದಸ್ಯರು ಹಾಗೂ ರಾಜ್ಯ ಕಾರ್ಯದರ್ಶಿಗಳಾದ ಕಾ.ಕೆ.ಉಮಾರವರು ಈ ಜನ ಹೋರಾಟದ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡುತ್ತಾ “ದೇಶದಲ್ಲಿ ೨೦ ಕೋಟಿ ಜನ ಅಪೌಷ್ಟಿಕತೆಯಿಂದ ಬಳಲುತ್ತಿದ್ದಾರೆ, 7000 ಜನ ಹಸಿವೆಯಿಂದ ಸಾಯುತ್ತಿದ್ದಾರೆ, ಅವರಲ್ಲಿ ಮಕ್ಕಳ ಸಂಖ್ಯೆ 4000 ದಷ್ಟು ಇದೆ. ಪ್ರತಿ ೫ ಜನರಲ್ಲಿ 3 ಜನ ನಿರುದ್ಯೋಗಿಗಳು. ಒಂದೆಡೆ ಅದಾನಿ ಆಸ್ತಿ 11.5 ಲಕ್ಷ ಕೋಟಿ, ಅಂಬಾನಿಯದು 10.5 ಲಕ್ಷ ಕೋಟಿ ಇದೆ, ಆದರೆ ಜನ ಸಾಮಾನ್ಯ ದಿನಕ್ಕೆ ಕೇವಲ 33 ರೂ. ಸಂಪಾದಿಸುತ್ತಾನೆ. ಇಷ್ಟೊಂದು ಭಾರೀ ಅಸಮಾನತೆ ತಾಂಡವವಾಡುತ್ತಿದೆ. ವಿದ್ಯಾಭ್ಯಾಸ ದುಬಾರಿಯಾಗಿ ಬಡವರಿಗೆ ಸಿಗುತ್ತಿಲ್ಲ, ಇರುವ ಸರ್ಕಾರಿ ಶಾಲೆಗಳು ಸೌಕರ್ಯಗಳಿಲ್ಲದೆ ಮುಚ್ಚುತ್ತಿವೆ. 1 ವರ್ಷದಲ್ಲಿ 10,000 ರೈತರು ಆತ್ಮಹತ್ಯೆ ಮಾಡಿಕೊಂಡರೆ, ಮಾನಸಿಕ ಖಿನ್ನತೆಯಿಂದ 2022ರಲ್ಲಿ 13,000 ವಿದ್ಯಾರ್ಥಿಗಳು ಪ್ರಾಣ ಕಳೆದುಕೊಂಡಿದ್ದಾರೆ. 11 ನಿಮಿಷಕ್ಕೆ ಒಬ್ಬ ಮಹಿಳೆ ಅತ್ಯಾಚಾರಕ್ಕೊಳಗಾಗುತ್ತಿದ್ದಾಳೆ. ಆಸ್ತಿಗಾಗಿ ಮಗ ತಂದೆಯನ್ನು ಸಾಯಿಸಿದ ಅಮಾನುಷ ಘಟನೆ ನಡೆದಿದೆ. ಬೆಲೆಗಳು ಗಗನಕ್ಕೇರುತ್ತಿವೆ, ಸರ್ಕಾರಿ ಆಸ್ಪತ್ರೆಗಳು ನರಕದ ಕೂಪಗಳಾಗಿವೆ. ಕೇವಲ ಎರಡೇ ವರ್ಷದಲ್ಲಿ 3000 ಬಾಣಂತಿಯರು ಸಾವನ್ನಪ್ಪಿದ್ದಾರೆ. ಇಂತಹ ಸಂದರ್ಭದಲ್ಲಿ ಜನ ಹೋರಾಟ ಬೆಳೆಸುವುದು ಅನಿವಾರ್ಯವಾಗಿದೆ. ಆದರೆ ಅವರ ನಡುವೆ ಜಾತಿ-ಕೋಮಿನ ವಿಷಬೀಜ ಬಿತ್ತಿ ಒಗ್ಗಟ್ಟನ್ನು ಮುರಿಯಲಾಗುತ್ತಿದೆ. ಜನರು ಈ ಎಲ್ಲಾ ಭೇದ-ಭಾವಗಳನ್ನು ಮೀರಿ ಒಂದಾಗಿ ಹೋರಾಟಕ್ಕೆ ಮುಂದಾಗಬೇಕು” ಎಂದರು.
ರಾಜ್ಯ ಸೆಕ್ರೆಟೇರಿಯೆಟ್ ಸದಸ್ಯರಾದ ಕಾ. ರಾಮಾಂಜನಪ್ಪ ಮಾತನಾಡಿ, “ಅಧಿಕಾರದಲ್ಲಿರುವ ರಾಜ್ಯ-ಕೇಂದ್ರ ಸರ್ಕಾರಗಳು ಅಧಿಕಾರದ ಕಿತ್ತಾಟದಲ್ಲಿ ಮುಳುಗಿವೆ. ಚುನಾವಣೆ ಮೂಲಕ ಗದ್ದುಗೆಯೇರಲು ಕೆಳಮಟ್ಟದ ಪ್ರಚಾರದಲ್ಲಿ ತೊಡಗಿವೆ. 40% ಕಮಿಷನ್ ಬಿಜೆಪಿ ಸರ್ಕಾರ ಅಂತ ಹೇಳಿ ಗ್ಯಾರಂಟಿ ಮೂಲಕ ಅಧಿಕಾರಕ್ಕೆ ಬಂದ ಕಾಂಗ್ರೆಸ್ 50% ಕಮಿಷನ್ ನಲ್ಲಿ ಮುಳುಗಿದ ಅಪಖ್ಯಾತಿಗೊಳಗಾಗಿದೆ. ಕೇವಲ ಗ್ಯಾರಂಟಿಗಳಿಂದ ಮಾತ್ರವೇ ಬಡವರ-ದುಡಿಯುವ ಜನರ ಸಮಸ್ಯೆಗಳನ್ನು ಬಗೆಹರಿಸಲು ಸಾಧ್ಯವಾಗಿಲ್ಲ. ಕೇಂದ್ರ ಸರ್ಕಾರ ನರೇಗಾಕ್ಕೆ ರೂ. 900 ಕೋಟಿ ಅನುದಾನ ಕಡಿತ ಮಾಡಿದೆ. ಉದ್ಯೋಗ ಸೃಷ್ಟಿಸಲಿಲ್ಲ. ಕೇಂದ್ರದಲ್ಲಿನ ಸರ್ಕಾರ ನೇರವಾಗಿ ದುಡಿಯುವ ಜನರ ಮೇಲೆ ಪ್ರಹಾರ ಮಾಡುತ್ತಿದೆ. ಇಲ್ಲಿ ಕಾಂಗ್ರೆಸ್ ಸರ್ಕಾರ ಸಹ ಅದಕ್ಕೆ ಭಿನ್ನವಾಗಿರದೆ, ರೈತ-ಕಾರ್ಮಿಕರಿಗೆ ಮಾರಕವಾದ ಕಾಯ್ದೆಗಳನ್ನು ಜಾರಿಗೊಳಿಸುತ್ತಿದೆ. ಈ ಎರಡೂ ಸರ್ಕಾರಗಳು ಮಾಲೀಕರ ಪರ ಸರ್ಕಾರಗಳು” ಎಂದು ಟೀಕಿಸಿದರು.
ಪ್ರಮುಖ ಬೇಡಿಕೆಗಳ ಮನವಿಪತ್ರವನ್ನು ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳಿಗೆ ನಿಯೋಗವೊಂದು ಭೇಟಿ ಮಾಡಿ ಸಲ್ಲಿಸಿತು. ಈ ಜನಹೋರಾಟದ ಪ್ರತಿಭಟನೆಯ ನೇತೃತ್ವವನ್ನು ಪಕ್ಷದ ರಾಜ್ಯ ಸಮಿತಿಯ ಸದಸ್ಯರಾದ ಕೆ.ಸೋಮಶೇಖರ್, ಎಂ. ಶಶಿಧರ್, ಎಂ. ಎನ್. ಶ್ರೀರಾಮ್, ಡಾ. ಟಿ. ಎಸ್. ಸುನೀತ್ ಕುಮಾರ್, ಬಿ. ಆರ್. ಅಪರ್ಣ, ವಿ. ಎನ್. ರಾಜಶೇಖರ್, ಬಿ. ರವಿ, ವಿ. ಜ್ಞಾನಮೂರ್ತಿ ಮುಂತಾದವರು ವಹಿಸಿದ್ದರು.