ಆಗಸ್ಟ್ 5: ಕಾಮ್ರೇಡ್ ಶಿವದಾಸ್ ಘೋಷ್ 50ನೇ ಸಂಸ್ಮರಣಾ ದಿನಾಚರಣೆ
ಸಮಾಜವಾದಿ ಕ್ರಾಂತಿಯ ದಾರಿಯಲ್ಲೊಂದು ಮುನ್ನಡೆ!
ಈ ಯುಗದ ಮಹಾನ್ ಮಾರ್ಕ್ಸ್ ವಾದಿ ಚಿಂತಕರು ಹಾಗೂ ನಮ್ಮ ಪಕ್ಷ ಎಸ್‌ಯುಸಿಐ (ಕಮ್ಯುನಿಸ್ಟ್) ಸಂಸ್ಥಾಪಕರಾದ ಕಾಮ್ರೇಡ್ ಶಿವದಾಸ್ ಘೋಷ್ ಅವರು ಕಂಡ ಶೋಷಣಾರಹಿತ ಸಮಾಜವಾದಿ ಭಾರತದ ಕನಸನ್ನು ನನಸಾಗಿಸಲು ಆಗಸ್ಟ್ 5 ಅನ್ನು ಸಂಕಲ್ಪ ತೊಡುವ ದಿನವಾಗಿ ದೇಶಾದ್ಯಂತ ಆಚರಿಸಲಾಗುತ್ತದೆ. ಬೆಂಗಳೂರಿನಲ್ಲಿ ಆಗಸ್ಟ್ 9 ರಂದು ಸಂಘಟಿಸಲಾಗಿದ್ದ ರಾಜ್ಯ ಮಟ್ಟದ ಈ ಸಂಸ್ಮರಣಾ ಸಭೆಗೆ ಮುಖ್ಯ ಭಾಷಣಕಾರರಾಗಿ ಆಗಮಿಸಿದ ಪಕ್ಷದ ಪಾಲಿಟ್‌ಬ್ಯೂರೋ ಸದಸ್ಯರಾದ ಕಾ. ಕೆ.ರಾಧಾಕೃಷ್ಣ ಅವರು ಈ ದಿನದ ಮಹತ್ವವನ್ನು ಸಭೆಗೆ ಮನಗಾಣಿಸಿದರು.
ಅವರ ಭಾಷಣದ ಸಂಕ್ಷಿಪ್ತ ರೂಪ:
ದೇಶಾದ್ಯಂತ ಕೇಂದ್ರ ಬಿಜೆಪಿ ಸರ್ಕಾರದ ಜನವಿರೋಧಿ ನೀತಿ-ನಿಲುವುಗಳ ವಿರುದ್ಧ ಹೋರಾಟದ ಅಲೆಗಳು ಏಳುತ್ತಿವೆ. 2019 -2020ರ ರೈತರ ಹೋರಾಟ, ಒಂದು ವರ್ಷ ಕಾಲ ನಡೆದು, ಸುಮಾರು 750 ಕ್ಕೂ ಹೆಚ್ಚು ರೈತ ಹೋರಾಟಗಾರರು ಹುತಾತ್ಮರಾದರು. ಕೊನೆಗೆ, ಸರ್ಕಾರ ಹೋರಾಟಕ್ಕೆ ತಲೆಬಾಗಿ ಕಾರ್ಪೊರೆಟ್‌ಪರ ಕರಾಳ ಕೃಷಿ ನೀತಿಗಳನ್ನು ಹಿಂಪಡೆಯಬೇಕಾಯಿತು. ಇತ್ತೀಚಿಗೆ, ನಮ್ಮ ದೇಶದ ಸುಪ್ರೀಂ ಕೋರ್ಟಿನ ಮುಖ್ಯ ನ್ಯಾಯಮೂರ್ತಿಗಳು, ನಿರುದ್ಯೋಗಿಗಳನ್ನು ಕಾಕ್ರೋಚ್‌ಗಳು (ಜಿರಳೆಗಳು) ಎಂದು ಜರೆದಿದ್ದು, ಜೆನ್ ಝೀಗಳಲ್ಲಿ ಆಕ್ರೋಶವನ್ನು ಹುಟ್ಟುಹಾಕಿ, ಕಾಕ್ರೋಚ್ ಜನತಾ ಪಾರ್ಟಿಗೆ (ಸಿಜೆಪಿ) ಜನ್ಮ ನೀಡಿತು. ಅಲ್ಲಿಂದ ಯುವಜನರಲ್ಲಿ ಸರ್ಕಾರವನ್ನು ಪ್ರಶ್ನಿಸುವ, ತಮ್ಮ ಹಕ್ಕುಗಳಿಗೆ ಆಗ್ರಹಿಸುವ ಮನೋಭಾವವೊಂದು ಬೆಳೆಯುತ್ತಾ, ಇದು, ‘ನೀಟ್’ ಪರೀಕ್ಷೆಯ ಅವ್ಯವಹಾರದ ವಿರುದ್ಧ ದೇಶಾದ್ಯಂತ ಹೋರಾಟದ ಕಿಡಿಯನ್ನು ಹತ್ತಿಸಿತು. ದೆಹಲಿಯ ಜಂತರ್ ಮಂತರ್‌ನಲ್ಲಿ ನಡೆದ ಈ ಅಭೂತಪೂರ್ವ ಹೋರಾಟ, ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡುವಂತೆ ಮಾಡಿತು. ಈ ಹೋರಾಟವನ್ನು ಹತ್ತಿಕ್ಕಲು, ಕೇಂದ್ರ ಬಿಜೆಪಿ ಸರ್ಕಾರ, ಪೊಲೀಸರ ಮೂಲಕ ಲಾಠಿ ಚಾರ್ಜ್, ಜಲಫಿರಂಗಿ, ಪೆಲೆಟ್ ಗನ್ ಬಳಸಿದರೂ, ವಿದ್ಯಾರ್ಥಿ-ಯುವಜನರು ಜಗ್ಗಲಿಲ್ಲ, ಧೈರ್ಯವಾಗಿ ಎದೆಗೊಟ್ಟು ನಿಂತರು. ಅತ್ಯಂತ ಸಮರೋತ್ಸಾಹದಿಂದ ನಡೆದ ಈ ರಾಜಕೀಯ ಹೋರಾಟ ಎಲ್ಲಾ ವಿದ್ಯಾರ್ಥಿ-ಯುವಜನ, ಪೋಷಕರಲ್ಲೂ ಉತ್ಸಾಹ ಇಮ್ಮಡಿಸಿತು. ಪೋಷಕರು ತಮ್ಮ ಮಗುವಿನ ಭವಿಷ್ಯಕ್ಕಾಗಿ ಎಂದು ಪುಟ್ಟ ಮಕ್ಕಳೊಂದಿಗೆ ಪ್ರತಿಭಟನೆಯಲ್ಲಿ ಭಾಗಿಯಾದರು. ವಿದೇಶೀ ದುಡ್ಡಿನಿಂದ, ಕುಮ್ಮಕ್ಕಿನಿಂದ ಈ ಹೋರಾಟ ನಡೆಯುತ್ತಿದೆ ಎಂದು ಅಪಪ್ರಚಾರ ಮಾಡುತ್ತಾ ಆಳುವ ಕೇಂದ್ರ ಸರ್ಕಾರ ಹೋರಾಟವನ್ನು ದಿಕ್ಕು ತಪ್ಪಿಸಲು ಯತ್ನಿಸಿತು. ಆದರೆ ದೇಶದ ಎಲ್ಲೆಡೆಯಿಂದ ಜನಸಾಮಾನ್ಯರು ಹೋರಾಟಗಾರರಿಗೆ ಗಿಗ್ ಪ್ಲಾಟ್‌ಫಾರಂಗಳ ಮೂಲಕ ಆಹಾರ, ನೀರು, ಇನ್ನಿತರ ಸಾಮಗ್ರಿ ನೀಡಿ, ಇದು ನಮ್ಮ ದೇಶದ ಜನರಿಂದಲೇ ನಡೆಯುತ್ತಿರುವ ಹೋರಾಟವೆಂದು ಸಾಬೀತು ಮಾಡಿದರು. ಕೇಂದ್ರ ಸರ್ಕಾರ, ಜನೈಕ್ಯತೆಯನ್ನು ಮುರಿಯಲು ಶತಾಯಗತಾಯ ಪ್ರಯತ್ನಿಸಿದರೂ ತಾವೆಲ್ಲಾ ಒಂದೇ ಎಂದು ಗಟ್ಟಿಯಾಗಿ ನಿಂತರು. ಇದರಿಂದ ಸರ್ಕಾರಕ್ಕೆ, ಅದರ ನೇತಾರರಾದ ಪ್ರಧಾನಿಯವರಿಗಾದ ಮುಖಭಂಗ, ಮಧ್ಯರಾತ್ರಿಯಲ್ಲಿ ಅವರು ಟೆಲಿಪ್ರಾಂಪ್ಟರ್ ಮೂಲಕ ದೇಶದ ಜನತೆಗೆ ಬಿತ್ತರಿಸಿದ ಸಂದೇಶದಲ್ಲಿ ಬಯಲಾಗಿದೆ.
ಕೇವಲ ದಮನ - ದಬ್ಬಾಳಿಕೆಯು ಜನರನ್ನು ಸದಾಕಾಲ ತುಳಿದಿಡಲು ಸಾಧ್ಯವಿಲ್ಲ
ಕೇಂದ್ರ ಮೋದಿ ಸರ್ಕಾರ ಜೆನ್ ಝೀ ಹೋರಾಟವನ್ನು ದಮನದ ಮೂಲಕ ನಿಯಂತ್ರಿಸಲು ಪ್ರಯತ್ನಿಸಿ ಸೋತು ಹೋಗಿದೆ. ಈ ಹೋರಾಟ ಕೇವಲ ಆರ್ಥಿಕ ಬೇಡಿಕೆಗೆ ಸೀಮಿತವಾದ ಹೋರಾಟವಲ್ಲ, ಇದು ರಾಜಕೀಯ ಹೋರಾಟ. ಅದಕ್ಕಾಗಿಯೇ ಹೊಸ ರಾಜಕೀಯ ಪ್ರಜ್ಞೆ ಜನರಲ್ಲಿ ಮೂಡಿದೆ. ಮೋದಿ ಸರ್ಕಾರದ ವೈಫಲ್ಯಗಳನ್ನು ಹೊಸ ತಲೆಮಾರು ಎತ್ತಿ ತೋರಿಸಿದೆ. ದಮನಕಾರಿ ಆಡಳಿತವು ‘ಫ್ಯಾಸೀವಾದ’ದ ಒಂದು ಮುಖವಷ್ಟೇ. ಕೇವಲ ದಮನ-ದಬ್ಬಾಳಿಕೆಯು ಜನರನ್ನು ಸದಾಕಾಲ ತುಳಿದಿಡಲು ಸಾಧ್ಯವಿಲ್ಲ ಎಂದು ಇತಿಹಾಸದಲ್ಲಿ ಪದೇಪದೇ ಸಾಬೀತಾಗಿದೆ. ಹಾಗಾಗಿ, ಫ್ಯಾಸೀವಾದವು ಮನವೊಲಿಕೆ ಮತ್ತು ದಮನ ಎರಡೂ ತಂತ್ರಗಳನ್ನು ಅಳವಡಿಸಿಕೊಳ್ಳುತ್ತದೆ ಎಂದು ಫ್ಯಾಸೀವಾದದ ಗುಣಲಕ್ಷಣವನ್ನು ಕಾಮ್ರೇಡ್ ಶಿವದಾಸ್ ಘೋಷ್ ಅವರು ಅದ್ಭುತವಾಗಿ ವಿವರಿಸಿದ್ದಾರೆ. ಲೆನಿನ್ ಅವರು ರಷ್ಯಾದಲ್ಲಿ ಬಂಡವಾಳಶಾಹಿ ವಿರೋಧಿ ಸಮಾಜವಾದಿ ನವೆಂಬರ್ ಮಹಾಕ್ರಾಂತಿಯನ್ನು ಯಶಸ್ವಿಯಾಗಿ ನೆರವೇರಿಸಿ, ಸಾಮಾಜಿಕ ವ್ಯವಸ್ಥೆಯ ಬದಲಾವಣೆಯ ಹಾದಿಯಲ್ಲಿ ಅದರ ಗಮ್ಯಸ್ಥಾನ ಕಮ್ಯುನಿಸಂ ಎಂಬ ಕಾರ್ಲ್ ಮಾರ್ಕ್ಸ್ ರವರ ಪ್ರತಿಪಾದನೆಯನ್ನು ಸಾಬೀತುಪಡಿಸಿದರು; ಮಾರ್ಕ್ಸ್ ವಾದ ಒಂದು ವೈಜ್ಞಾನಿಕ ತತ್ವಜ್ಞಾನ ಎಂದು ಇಡೀ ವಿಶ್ವಕ್ಕೇ ತೋರಿಸಿಕೊಟ್ಟರು. ನಂತರ ಜಗತ್ತಿನಾದ್ಯಂತ ಬಂಡವಾಳಶಾಹಿಗಳು ಎಚ್ಚೆತ್ತುಕೊಂಡರು ಮತ್ತು ತಮ್ಮ ಉಳಿಗಾಲಕ್ಕಾಗಿ ಫ್ಯಾಸೀವಾದಕ್ಕೆ ಮೊರೆ ಹೋದರು. ಜಗತ್ತಿನಲ್ಲಿ ಸಮಾಜವಾದದ ಕುರಿತು ಆಕರ್ಷಣೆ ಇರುವವರೆಗೆ ಬಂಡವಾಳಶಾಹಿ ಪಕ್ಷಗಳೂ ಕೂಡ ಸಮಾಜವಾದದ ಹೆಸರನ್ನು ಬಳಸಿಕೊಂಡವು. ಬಿಜೆಪಿ ಕೂಡ ಗಾಂಧಿವಾದಿ ಸಮಾಜವಾದವನ್ನು ತನ್ನ ಸಂವಿಧಾನದಲ್ಲಿಟ್ಟುಕೊಂಡಿದೆ. ಹಿಟ್ಲರ್ ಕೂಡ ರಾಷ್ಟ್ರೀಯ ಸಮಾಜವಾದದ ಹೆಸರಿನಲ್ಲಿ ಕೆಲವೊಂದು ಸಮಾಜ ಕಲ್ಯಾಣ ಕ್ರಮಗಳನ್ನು ಜಾರಿಗೆ ತಂದನು. ಮನವೊಲಿಕೆ ಹಾಗೂ ದಮನದ ಮೂಲಕ ಜನಗಳನ್ನು ಗೊಂದಲಕ್ಕೊಳಗಾಗಿಸಿದ. ಅಂಧಶ್ರದ್ಧೆ ಹಾಗೂ ಅಂಧಾಭಿಮಾನದಿಂದ ಜನರು ಹಿಟ್ಲರ್‌ನನ್ನು ದೇವರ ಸಮಾನ ಎಂದು ಭಾವಿಸಿದರು; ಅವನು ತನ್ನ ಅಮಾನವೀಯ, ಫ್ಯಾಸೀವಾದಿ ನೀತಿಗಳ ಮೂಲಕ ಯಹೂದಿಗಳ, ಕಮ್ಯುನಿಸ್ಟರ ಹತ್ಯಾಕಾಂಡ ಮಾಡಿದಾಗ, ಜರ್ಮನ್ ಜನರೇ ಅವನ ಪರ ನಿಂತರು. ಇದರಿಂದಾದ ಘೋರ ಪರಿಣಾಮಗಳನ್ನು ಇಡೀ ಜಗತ್ತೇ ನೋಡಿದೆ. ಅವನ ಅಂತಿಮ ಗುರಿ ಕಮ್ಯುನಿಸಂ ನಿರ್ನಾಮದ ಕಡೆಗಿದ್ದು, ಬಂಡವಾಳವಾದವನ್ನು ಸಂರಕ್ಷಿಸುವುದೇ ಆಗಿತ್ತು. ಹೀಗೆ, ಫ್ಯಾಸೀವಾದ ಎಂಬುದು ಸಮಾಜವಾದಿ ಕ್ರಾಂತಿಯ ಭಯದಿಂದ ಹುಟ್ಟಿದ ಬಂಡವಾಳಶಾಹಿ ವ್ಯವಸ್ಥೆಯ ಪ್ರತಿಕ್ರಿಯೆ ಎಂಬ ಶಿವದಾಸ್ ಘೋಷ್ ಅವರ ವಿಶ್ಲೇಷಣೆ ಇಂದಿಗೂ ಪ್ರಸ್ತುತ. ಜನಪ್ರಿಯ ನಾಣ್ನುಡಿಯೊಂದರಂತೆ ಕೆಲವು ಜನರನ್ನು ಸದಾ ಗೊಂದಲಕ್ಕೊಳಗಾಗಿಸಬಹುದು, ಆದರೆ ಎಲ್ಲಾ ಜನರನ್ನು ಎಲ್ಲಾ ಕಾಲಕ್ಕೂ ಗೊಂದಲಗೊಳಿಸಲು ಸಾಧ್ಯವಿಲ್ಲ. ದೇಶ-ವಿದೇಶಗಳಲ್ಲಿ ಸ್ಫೋಟಗೊಳ್ಳುತ್ತಿರುವ ಜನಾಂದೋಲನಗಳ ಮೂಲಕ ಈ ಸತ್ಯ ಮತ್ತೆ ಮತ್ತೆ ಅನಾವರಣಗೊಳ್ಳುತ್ತಿದೆ. ಸಮಾಜವನ್ನು ಪರಿವರ್ತನೆ ಮಾಡುವ ಹೊಣೆ ಈಗ ಇರುವುದು ದುಡಿಯುವ ವರ್ಗದ ಮೇಲೆ, ಅದಕ್ಕಾಗಿ ಶ್ರಮಿಸುತ್ತಿರುವ ದೇಶದ ಕ್ರಾಂತಿಕಾರಿ ಪಕ್ಷ ಎಸ್‌ಯುಸಿಐ (ಸಿ) ಪಕ್ಷದ ಕಾರ್ಯಕರ್ತರು, ಬೆಂಬಲಿಗರ ಮೇಲೆ. ಅದಕ್ಕಾಗಿ, ಮೊದಲು ನಮ್ಮನ್ನೇ ನಾವು ಪರಿವರ್ತಿಸಿಕೊಳ್ಳಬೇಕಾಗಿದೆ, ನಮ್ಮ ಪ್ರಜ್ಞಾಮಟ್ಟವನ್ನು ಉನ್ನತೀಕರಿಸಿಕೊಳ್ಳಬೇಕಾಗಿದೆ. ಪ್ರಜ್ಞಾಮಟ್ಟದ ಕುಸಿತವೇ ಅಂಧಾನುಕರಣೆಗೆ ಎಡೆ ಮಾಡಿಕೊಡುತ್ತದೆ. ನಮ್ಮ ನಡುವೆ ಯಾಂತ್ರಿಕ ಸಂಬಂಧದ ಬದಲಾಗಿ ಸಂಬಂಧಗಳು ದ್ವಂದ್ವಾತ್ಮಕವಾಗಿರಬೇಕು, ವಿಮರ್ಶಾತ್ಮಕವಾಗಿರಬೇಕು, ಖಾಸಗಿ ಆಸ್ತಿ ಮನೋಭಾವವನ್ನು ತೊರೆದು ಕ್ರಾಂತಿಯ ಜೊತೆ ವಿಲೀನವಾಗಬೇಕು. ಇದಕ್ಕಾಗಿ ನಮ್ಮ ಚಿಂತನಾ ಕ್ರಮ ಬದಲಾಗಬೇಕು, ನಮ್ಮ ಕಂಫರ್ಟ್ ಜೋನ್ ನಿಂದ ಹೊರಬಂದು ಕಾರ್ಮಿಕವರ್ಗದ ನ್ಯಾಯಪ್ರಜ್ಞೆಯನ್ನು ಎತ್ತಿ ಹಿಡಿಯಬೇಕು. ಮಾನವತಾವಾದ ಎನ್ನುವುದು ಬಂಡವಾಳಶಾಹಿಗಳ ಸರ್ವಾಧಿಕಾರವಾದ ಬಂಡವಾಳವಾದದ ಸಂಸ್ಕೃತಿ. ಆದರೆ, ಸಾಮೂಹಿಕವಾದವು ಕಾರ್ಮಿಕವರ್ಗದ ಸರ್ವಾಧಿಕಾರವಾದ ಸಮಾಜವಾದದ ಸಂಸ್ಕೃತಿ. ಅದು ಮಾನವತಾವಾದಕ್ಕಿಂತ ಉನ್ನತ ಸಂಸ್ಕೃತಿ. ಹಾಗಾಗಿ, ಇತಿಹಾಸದಲ್ಲಿ ಮಾನವತಾವಾದವೇ ಸರ್ವಶ್ರೇಷ್ಠ ಸಂಸ್ಕೃತಿಯಲ್ಲ. ಈ ಕುರಿತು ನಮ್ಮ ಆಲೋಚನಾ ಲಹರಿಯಲ್ಲಿ ಬದಲಾವಣೆ ತರಬೇಕಾಗಿದೆ. ಕಾಮ್ರೇಡ್ ಘೋಷ್ ಹೇಳಿದಂತೆ ದೇಶದಲ್ಲಿ ಮತ್ತೆ ಮತ್ತೆ ಹೋರಾಟದ ಅಲೆಗಳು ಏಳುತ್ತವೆ, ಮತ್ತೆ ಮತ್ತೆ ಹಿಂದೆ ಸರಿಯುತ್ತವೆ. ಹಾಗಾಗಿ, ದೇಶಾದ್ಯಂತ ಅಲೆಗಳಂತೆ ಉಕ್ಕಿಬರುತ್ತಿರುವ ಇಂತಹ ಹೋರಾಟಗಳು ಸಮಾಜದಲ್ಲಿ ಮೂಲಭೂತ ಬದಲಾವಣೆ ತರಬೇಕೆಂದರೆ, ಅದರ ನೇತೃತ್ವವನ್ನು ಸರಿಯಾದ ರಣನೀತಿ-ರಣತಂತ್ರ ಇರುವ ಕ್ರಾಂತಿಕಾರಿ ಪಕ್ಷ ವಹಿಸಿಕೊಳ್ಳಬೇಕಾಗುತ್ತದೆ. ಇಲ್ಲವಾದಲ್ಲಿ ಕೆಲವು ಸುಧಾರಣೆಗಳೊಂದಿಗೆ ಇವು ಕ್ಷೀಣವಾಗುತ್ತವೆ. ಅದಕ್ಕಾಗಿ, ನನ್ನ ಮನವಿಯೆಂದರೆ, ನಮ್ಮ ಪಕ್ಷ ಎಸ್‌ಯುಸಿಐ (ಕಮ್ಯುನಿಸ್ಟ್) ಬಲಗೊಳಿಸಿ, ದೇಶದಲ್ಲಿ ಬಂಡವಾಳಶಾಹಿ ವಿರೋಧಿ ಸಮಾಜವಾದಿ ಕ್ರಾಂತಿ ನೆರವೇರಲು ಸಕ್ರಿಯವಾಗಿ ಪಾಲ್ಗೊಳ್ಳಿ. ಇದಕ್ಕಾಗಿ ಈ ದಿನ ಸಂಕಲ್ಪ ಕೈಗೊಳ್ಳಿ.
ಅಧ್ಯಕ್ಷತೆ ವಹಿಸಿದ್ದ ಎಸ್‌ಯುಸಿಐ (ಕಮ್ಯುನಿಸ್ಟ್) ಪಕ್ಷದ ರಾಜ್ಯ ಕಾರ್ಯದರ್ಶಿಗಳಾದ ಕಾಮ್ರೇಡ್ ಕೆ.ಉಮಾರವರು, ಅಂತರರಾಷ್ಟ್ರೀಯ ವಿದ್ಯಮಾನಗಳ ಕುರಿತು ಮಾತನಾಡುತ್ತಾ, ಅಮೆರಿಕಾದ ಸಾಮ್ರಾಜ್ಯಶಾಹಿ ನೀತಿಯನ್ನು ತೀವ್ರವಾಗಿ ಖಂಡಿಸಿದರು. ಅಮೆರಿಕಾ ತನ್ನ ಸಾಮ್ರಾಜ್ಯಶಾಹಿ ದಾಹದಾಸೆಯಿಂದ, ಜಾಗತಿಕ ಮಾರುಕಟ್ಟೆಯಲ್ಲಿ ಏಕಸ್ವಾಮ್ಯವನ್ನು ಸ್ಥಾಪಿಸಲು ಸುಮಾರು 58 ದೇಶಗಳನ್ನು ಗುರಿಯಾಗಿಸಿಕೊಂಡಿದೆ. ಆದರೆ ಇದನ್ನು ವಿರೋಧಿಸುತ್ತಾ ಅಮೆರಿಕಾದ ಲಕ್ಷಾಂತರ ಜನರು “ನೋ ಕಿಂಗ್” (ರಾಜ ಬೇಡ) ಎಂಬ ಘೋಷಣೆಯಡಿ ಸಂಘಟಿತರಾಗಿದ್ದಾರೆ; ಅಮೆರಿಕಾ ಹಾಗೂ ಇಸ್ರೇಲ್‌ಗಳ ಯುದ್ಧದಾಹಿ ಕ್ರಮಗಳ ವಿರುದ್ಧ ಪ್ರಪಂಚದಾದ್ಯಂತ 80 ಲಕ್ಷಕ್ಕೂ ಹೆಚ್ಚು ಜನ ಸಿಡಿದೆದ್ದಿದ್ದಾರೆ. ಮಹಾನ್ ಲೆನಿನ್ ಪ್ರತಿಪಾದಿಸಿದಂತೆ, ಸಾಮ್ರಾಜ್ಯವಾದ ಇರುವವರೆಗೂ ಯುದ್ಧದ ಅಪಾಯ ಜೀವಂತವಾಗಿರುತ್ತದೆ. ಸಂಘಟಿತ ಚಳವಳಿಯಿಂದ ಮಾತ್ರ ಯುದ್ಧದ ಹುನ್ನಾರಗಳನ್ನು ಸೋಲಿಸಲು ಸಾಧ್ಯ ಎಂದವರು ವಿವರಿಸಿದರು. ಕೇಂದ್ರದ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರವು ದಮನಕಾರಿ ಕಾಯ್ದೆಗಳನ್ನು ಜಾರಿಗೆ ತರುವ ಮೂಲಕ ಮತ್ತು ಭಿನ್ನಾಭಿಪ್ರಾಯದ ಧ್ವನಿಗಳನ್ನು ಅಡಗಿಸುವ ತಂತ್ರವಾಗಿ ಇಡಿ, ಸಿಬಿಐ ದಾಳಿಗಳನ್ನು ನಡೆಸುತ್ತಾ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ವ್ಯವಸ್ಥಿತವಾಗಿ ಹೊಸಕಿ ಹಾಕುತ್ತಿದೆ ಎಂದವರು ಹೇಳಿದರು. ರಾಜ್ಯದಲ್ಲಿ ಬರಗಾಲ ತಾಂಡವವಾಡುತ್ತಾ, ಕೃಷಿ ಸೊರಗುತ್ತಿರುವಾಗ, ಈ ಬಗ್ಗೆ ಕನಿಷ್ಠ ಕಾಳಜಿಯೂ ಇಲ್ಲದೆ, ಶಾಸಕರು ಕೇವಲ ಮಂತ್ರಿಗಿರಿಗಾಗಿ ಪೈಪೋಟಿ ನಡೆಸುತ್ತಿರುವ ಬಗ್ಗೆ ಅವರು ಆಕ್ರೋಶ ವ್ಯಕ್ತಪಡಿಸಿದರು. ರಾಜ್ಯ ಸರ್ಕಾರ ಸರ್ಕಾರಿ ಶಾಲೆಗಳನ್ನು ಮುಚ್ಚಿ ಖಾಸಗೀಕರಣದ ಭಾಗವಾಗಿ ಕೆಪಿಎಸ್ ಮ್ಯಾಗ್ನೆಟ್ ಶಾಲೆಗಳನ್ನು ತೆರೆಯುವುದರ ವಿರುದ್ಧ ಯಶಸ್ವಿ ಹೋರಾಟ ನಡೆಸಿದ ವಿದ್ಯಾರ್ಥಿ-ಪೋಷಕರನ್ನು ಹಾಗೂ ಸಾರ್ವಜನಿಕ ಶಿಕ್ಷಣ ಉಳಿಸಿ ಸಮಿತಿಯನ್ನು ಶ್ಲಾಘಿಸಿದರು. ಕೊನೆಯಲ್ಲಿ, ಅವರು ಪಕ್ಷವನ್ನು ಬಲಪಡಿಸಲು ಮತ್ತು ಶ್ರಮಿಕ ವರ್ಗದ ವಿಮುಕ್ತಿಗಾಗಿ ಕಾಮ್ರೇಡ್ ಶಿವದಾಸ್ ಘೋಷ್ ಅವರ ವಿಚಾರಗಳನ್ನು ಮೈಗೂಡಿಸಿಕೊಳ್ಳಬೇಕೆಂದು ಪಕ್ಷದ ಎಲ್ಲಾ ಸದಸ್ಯರು ಮತ್ತು ಬೆಂಬಲಿಗರಿಗೆ ಕರೆ ನೀಡಿದರು.
ಭಾಷಣಕಾರರಾಗಿ ಆಗಮಿಸಿದ್ದ ಪಕ್ಷದ ರಾಜ್ಯ ಸೆಕ್ರೆಟೇರಿಯಟ್ ಸದಸ್ಯರಾದ ಕಾಮ್ರೇಡ್ ಕೆ.ಸೋಮಶೇಖರ್ ಅವರು ಮಾತನಾಡಿ, ಇಂದು, ಸಮಾಜವು ತೀವ್ರ ಸಂಕಷ್ಟಕ್ಕೆ ಸಿಲುಕಿದೆ. ಪ್ರಮುಖ ಸಾರ್ವಜನಿಕ ಕ್ಷೇತ್ರಗಳು, ಅದರಲ್ಲೂ ಮುಖ್ಯವಾಗಿ ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರಗಳು ವ್ಯಾಪಾರೀಕರಣವಾಗುತ್ತಿವೆ. ಕೆಪಿಎಸ್‌ಸಿ ಹಗರಣಗಳು ಎಲ್ಲರ ಕಣ್ಣೆದುರಿಗೆ ಬಯಲಾಗಿವೆ. ಕರ್ನಾಟಕದ ಕಾಂಗ್ರೆಸ್ ನೇತೃತ್ವದ ಸರ್ಕಾರವು ಮೇ ತಿಂಗಳಲ್ಲಿ ಕನಿಷ್ಠ ವೇತನವನ್ನು ಪರಿಷ್ಕರಿಸಿತು, ಇದನ್ನು ಎಲ್ಲರೂ ಶ್ಲಾಘಿಸಿದ್ದರು. ಆದರೆ, ಕೇವಲ ಎರಡು ತಿಂಗಳ ನಂತರ, ಜುಲೈನಲ್ಲಿ, ಅದೇ ಸರ್ಕಾರವು ತನ್ನದೇ ನಿರ್ಧಾರವನ್ನು ಪುನರ್‌ಪರಿಶೀಲಿಸುತ್ತಿದೆ; ಮತ್ತು ಶ್ರಮಿಕ ವರ್ಗದ ಜನರು ಕನಿಷ್ಠ ವೇತನವನ್ನು ಪಡೆಯಲು ಇನ್ನೂ ಹೋರಾಟ ಮಾಡಬೇಕಾದ ಪರಿಸ್ಥಿತಿಯಿದೆ ಎಂದು ಖೇದ ವ್ಯಕ್ತಪಡಿಸಿದರು. ಸಾರ್ವಜನಿಕ ನಿಧಿಯಿಂದ ನಿರ್ಮಿಸಲಾದ ವಿದ್ಯುತ್, ನೀರು ಸರಬರಾಜು, ಇಂಧನ ಮತ್ತು ರೈಲ್ವೆ ಸೇರಿದಂತೆ ಅತ್ಯಗತ್ಯ ಸೇವೆಗಳನ್ನು ಮತ್ತು ಸಾರ್ವಜನಿಕ ಸೇವೆಗಳನ್ನು ಖಾಸಗೀಕರಣಗೊಳಿಸಲು ಸತತವಾಗಿ ಬಂದ ಸರ್ಕಾರಗಳು ಹಟಕ್ಕೆ ಬಿದ್ದಿವೆ ಎಂದು ಅವರು ಟೀಕಿಸಿದರು.
ಪಕ್ಷದ ನೂರಾರು ಸದಸ್ಯರು, ಬೆಂಬಲಿಗರು ಮತ್ತು ಸಾರ್ವಜನಿಕರು ಅತ್ಯಂತ ಉತ್ಸಾಹದಿಂದ ಭಾಗವಹಿಸಿದ್ದರು. ಪಕ್ಷದ ರಾಜ್ಯ ಸಮಿತಿಯ ಸದಸ್ಯರು ವೇದಿಕೆಯಲ್ಲಿದ್ದು, ಸಭೆಯ ಆರಂಭದಲ್ಲಿ ಕಾಮ್ರೇಡ್ ಘೋಷ್ ಅವರಿಗೆ ಪುಷ್ಪನಮನ ಹಾಗೂ ಕ್ರಾಂತಿಕಾರಿ ನಮನಗಳನ್ನು ಸಲ್ಲಿಸಿದರು; ಅವರ ಕುರಿತಾದ ಕ್ರಾಂತಿಕಾರಿ ಗೀತೆಯನ್ನು ಪ್ರಸ್ತುತಪಡಿಸಲಾಯಿತು. ಕಾಮ್ರೇಡ್ ಘೋಷ್‌ರವರ ಬೋಧನೆಯಾಧಾರದಲ್ಲಿ ಶೋಷಣಾರಹಿತ ನವಸಮಾಜವನ್ನು ಕಟ್ಟುವ ಸಂಕಲ್ಪದೊಂದಿಗೆ, ಕ್ರಾಂತಿಕಾರಿ ಘೋಷಣೆಗಳೊಂದಿಗೆ ಸಭೆ ಮುಕ್ತಾಯಗೊಂಡಿತು.